Su progetu Ajò vi semmu

Su progetu “Ajò vi semmu” torrat pro su segundu annu consecutivu cun sas atividades suas de formatzione e sos laboratòrios, sas initziativas culturales e de promotzione linguìstica e s’Isportellu cun Tàtari Comuna capufila.

S’initziativa coordinada dae s’Istitutu Camillo Bellieni custu annu ismànniat s’atividade sua, e acollit Sènnaru in su grupu giai formadu dae sas comunas de Posthudorra, Isthintini, Sossu, Codaruina e Castheddu, in prus de su capufila.

Su progetu pro s’annualidade 2018 est finantziadu pro mèdiu de sa lege 482, e at a èssere congruidu intro de su mese de martzu.

Pro  s’emergèntzia sanitària chi semus atraessende, at a èssere acumpridu in modalidade ”smart working” pro sos operadores e “online” pro su chi pertocat sas atividades de formatzione e promotzione linguìstica.

Sos operadores incarrigados sunt Lucia Sechi, Gianni Muroni, Annalaura Pirisi e Adriana Cocco.

Sunt cunfirmados puru sos maistros chi ant dadu su contributu issoro durante sa prima editzione.

Pro sa formatzione in sardu sunt presentes Micheli Pinna e Daniela Masia; pro su tataresu est cunfirmadu torra Mario Lucio Marras; Antonello Bazzu e Giovanni Loriga ant a contivigiare sos laboratòrios de Teatru e Poesia, Gianluca Dessì sos laboratòrios de mùsica e Giovanni Fancello sos laboratòrios de coghina.

Su coordinamentu de sas atividades est afidadu a Maria Doloretta Lai.